SUN搞作：少膽虫手記：團結是力量

喺人都知《爛果》作新聞當食飯。讀者可能唔知道，實情少膽虫都驚收尾嗰兩年，唔想成日害人害物，可惜腦細淫黎好高騖遠……少膽虫都唔明，都一把年紀啦，淫黎都仲係沉迷喺啲讚美說話入面，例如讚佢叻仔、讚《爛果》喺佢統領之下銷量全城最高。難得條虫有班驚炒魷嘅同事，例如牙擦哥嗰啲，三日唔埋兩日就建議條虫登下啲統計廣告，證明壹全霉嘅市場佔有率全城最高、《爛果》同《喪報》最多人睇。老實講，少膽虫都唔想做咁多嘢，但既然自己班虫仔虫女一手一腳計晒數、度晒橋，話口未完就作完一版紙，條虫都唔介意畀啲空間佢地發揮嘅。

少膽虫不嬲相信團結就是力量，做呢行一人不成事，編劇都靠幾條友度橋啦，何況《爛果》日日都要吹水？之前條虫就獨家披露咗《爛果》嘅理念，「每小隊嘅腦腫都係另一小隊嘅腦腫」，出街之後，好多讀者都話睇唔明，其實少膽虫嘅說話好清晰，就係娛樂可以做港聞體育可以做副刊以至記者都可以做編輯……無錯，少膽虫最buy通才，假如每個虫仔虫女都可以身兼幾職，每日做到隻「積」咁先收工，咁壹全霉就可以開源節流喇！條虫成日同班仔女講，請咁多個人有咩好？人多自然是非多，何況自由主義經濟之下，市場流動得快，自然就汰弱留強o架啦！喺《爛果》留得低嘅全部都係精英嚟嘅！

條虫好欣賞嘅手下牙擦哥就深諳此道喇，前日朝早少膽虫派佢出去偷影賤精先生偷情，可能《爛果》班伙記太精英，出到去唔多受歡迎，牙擦哥畀人你推我撞，伏咗成日都影唔到一張相，一向聰明嘅牙擦哥使出佢最後一着－「飛撲」，一嘢搶咗正義傳媒部相機然後copy and paste！雖然最後失敗收場，但少膽虫真係好欣賞啲咁搏嘅仔女！假如壹全霉賣盤賣得成，淫黎一定第一個升佢！

少膽虫