政壇：政商定格：校長盃港大和波執身彩

香港大學、中文大學第十屆兩大校長盃足球賽尋日舉行，港大校長徐立之同中大校長沈祖堯到場主持開波儀式，但就冇落場。沈校長自認唔識踢波，無謂獻醜，而早年曾落場「戥腳」守龍門嘅徐校長就笑言近年疏於練習，即使「隻腳好痕」都唔敢落場，怕扭親喎！

兩大校長盃自○三年起舉行，以紀念兩間院校合作對抗沙士，但賽事過去九年由中大獨領風騷，除勝出六屆外，舊年更送港大三隻光蛋，難怪徐校長自爆隊友嚟自唔同學院，部分都係落場前先認識兼自我介紹，有啲甚至一年先踢一次波，所以踢起上嚟抽筋、拗柴都係人之常情，唔怪得佢強調最緊要「友誼第一」啦！

好彩，港大尋日最終以一比一同中大打成平手，叫做執番身彩，為下年卸任嘅徐校長挽回少少面子。另一邊廂，近來積極減肥嘅沈校長就話平日鍾情打網球同羽毛球，加上囡囡向佢施壓要求定時食素，瘦身行動似乎漸見成效，佢更笑稱「褲頭開始有啲鬆」。