政壇：搞搞政：政總員工食晏各顯神通

自政府總部同立法會搬咗去金鐘添馬艦後，兩個地方都分別開咗間新餐廳，方便喺兩個建築物返工嘅人食晏，情況最近有啲變化。據聞政總嘅官場中人為方便工作好多時都會約人去政總附近嘅中信大廈開餐，雖然中信開咗唔同種類嘅食肆，但繁忙時間仍有人滿之患，價錢亦偏貴，所以佢哋開始搵開餐新蒲點，第一步係離開金鐘，轉戰中環、灣仔同銅鑼灣等地，貪佢哋係港鐵沿線，有需要可即時趕返政總開會同做嘢。

另一招係過海搵食，近則尖沙咀，遠則旺角甚至九龍站，共通點都係港鐵沿線，一來一回絕不費時，食物同餐廳選擇都拉闊咗好多，有官場中人仲打趣話只要唔撞到熟口熟面嘅人，去遠啲食完全唔係問題。

本報早前率先報道有街外人去立會門口拎張訪客證，睇準可自由出入立會圖書館之便，於是趁機偷雞去圖書館旁邊嘅餐廳開飯，已惹起一眾議員、助理投訴逼爆立會餐廳，聽聞秘書處都準備隨時出招做嘢。消息指第一招係午飯時間停止發放訪客證去圖書館，免得有人渾水摸魚入餐廳開餐，第二招係要行政署同意，一旦立會餐廳開放畀公務員食飯，政總餐廳都要平等對待畀立會中人進出。