政壇：譚耀宗林健鋒烏龍連場

建仔主席譚耀宗同商界議員林健鋒縱橫政圈多年，點知尋日兩人都先後擺烏龍，最終要由全國人大常委會法律工作委員會主任委員喬曉陽親自澄清。

三十多名建制派議員尋日喺深圳同喬老爺座談，首先「擺烏龍」嘅係曾參與基本法起草工作嘅譚Sir，事關佢介紹喬老爺出場時，竟然稱呼佢做基本法委員會法工委主任，搞到喬老爺笑住口否認，逕自介紹自己新職其實隸屬全國人大常委會，之後又趁機介紹新任基本法委員會副主任張榮順畀大家認識。

其後林健鋒喺座談會中段引述喬老爺部分普選特首言論畀傳媒交功課，話「中央對普選行政長官嘅立場堅定不移，特首應該愛國愛港，如果係同中央政府對抗嘅人，係對香港不利，係唔能夠接受。」點知隨後喬老爺喺傳媒五分鐘拍攝時段，主動澄清話知悉手提電話載有佢嘅小部分言論，「說我講不能選對國家不利、對香港不利的人，我沒講這個話，媒體就登出來，變成我講這個話，這個話就寬了。我講得很清楚，就是不能接受與中央對抗的人。」