政壇：郭晶晶拍住老公幫青聯

霍啟剛同「跳水公主」郭晶晶舊年十一月結婚後，每逢出席活動都有影皆雙。身為青年聯會常務副主席嘅啟剛近日忙於處理會務，而作為賢內助嘅晶晶當然夫唱婦隨。

青聯同屬下嘅青聯賢慧社將於下月喺海洋公園主辦第四屆「青聯賢慧愛家日」，邀請八百多個來自復康院舍嘅兒童同家長參與，旨在促進家庭和諧同宣揚社會共融嘅精神。啟剛兩夫婦日前同青聯主席葉振都、賢慧社召集人羅詠詩、活動召集人周沁齊齊開會「腦震盪」，計劃吓點樣將活動搞得有聲有色。

身為活動大使嘅晶晶話覺得今次活動好有意義，期待活動當日同參加者分享經驗，同埋鼓勵大家建造和諧嘅家庭及社會。啟剛同晶晶呢對金童玉女，屆時孖住出嚟宣傳活動，肯定事半功倍，唔知晶晶有冇打算加入青聯大家庭，名正言順做老公嘅得力助手呢？