政壇：尤德夫人盡得丈夫真傳

英國前首相戴卓爾夫人嘅機密檔案曝光，咁啱尋日係尤德爵士紀念基金頒獎禮，已故港督尤德爵士夫人彭雯麗遠道由英國來香港擔任頒獎嘉賓，仲同尤德爵士紀念基金理事會主席、當年任職副常務司嘅陳祖澤聚首一堂，認真難得。

尤德爵士當年係香港前途問題英方談判代表，見證中英聯合聲明簽署，八六年喺北京訪問，午夜喺英國大使館猝死。記者向尤德夫人問及解密嘅事，佢話自己唔在場，陳祖澤立即話中英談判已經係歷史，而外交係高度機密，連枕邊人都唔會知，尤德夫人微笑點頭附和。至於一七普選方案，坊間話會有候選人篩選機制，尤德夫人點睇？陳祖澤又話︰「尤德夫人無過問香港政治好耐啦！」記者最後再問尤德夫人認為香港會唔會有真普選，佢就答︰「呢樣嘢需要繼續討論。」不愧係外交家嘅夫人。