政壇：李漢奸偽術被揭

港大法律系副教授戴耀廷提出嘅「佔領中環」行動近日成為坊間討論焦點，佢仲積極接觸泛民政黨同民間團體，希望可以爭取更多人支持。外號「李漢奸」嘅白鴿黨創黨主席李柱銘早前接受傳媒訪問，公開話自己會走上違法抗命之路，參加「佔領中環」行動。萬一被警方拘捕，佢仲口響響話願意被吊銷大律師牌照，又話希望自己可以成為「第一被告」。不過，依家除咗白鴿黨等部分泛民政黨明確表示會支持「佔領「中環」外，上周四曾同戴耀廷會面嘅公文袋仍未有結論，據聞即使領導層支持行動，都係會以個人身份參與。

民主倒梁力量尋日以「抗爭才是出路」為題舉行街頭論壇，綽號「快必」嘅譚得志就批評喺資深大律師排名第一嘅李柱銘肯參加「佔領中環」，仲願意冇條件被大律師公會「釘牌」嘅言論偽善。佢話李柱銘退休多年，依家只不過係周不時出嚟指指點點，根本就唔會重新執業，所以一定唔會介意「釘牌」。佢又鬧李柱銘得個講字，仲話聽到佢咁講就標晒冷汗，「佢咁講真係有鬼用咩？」

攞住釘牌做幌子

查實李柱銘仲未退休，而佢只係想攞住釘牌同希望成為「第一被告」嚟做幌子，扮晒壯烈犧牲啫，佢確實係「偽」術家。

快必之後又批評話「佔領中環」嘅三位領袖好多時講嘢唔敢去得太盡，畀人感覺就好似想「就住就住」，又質疑朱耀明牧師攞住本美國護照，唔知佢喺執行「佔領中環」時係咪真係抱住「視死如歸」嘅決心。至於戴耀廷話希望可感召到一萬人上街，快必就話自己根本感覺唔到戴耀廷有感召力，又話「佔領中環」行動應由所有市民帶領，認為市民根本唔需要擔心活動會被部分政黨或人士抽水喎！