政壇:李小龍撐保釣助籌款?

保釣行動委員會最近接連有好消息,繼早前海事處決定撤銷檢控保釣船「啟豐二號」非法出海後,保釣成員陳妙德、羅堪就同「阿牛」曾健成近日到美加等地籌款時,有當地保釣人士捐出有李小龍親筆簽名嘅荷里活電影合約,供保釣委員會拍賣作為維修「啟豐二號」嘅經費,配合李小龍逝世將近四十周年,估計呢個合約可籌得一百萬港元。

捐出珍藏合約嘅係洛杉磯僑領陳燦培,佢後生時曾率領南加州嘅華僑及留學生到日本駐洛杉磯領事館抗議,係老牌保釣人士。熱愛收藏各類文物嘅陳燦培幾年前以數萬美元購入該份李小龍簽名電影合約,依家為保釣割愛,仲幫手安排運往香港拍賣。

第一手消息請下載on.cc東方互動iPhone/iPad/Android/Windows Phone Apps

陳燦培(前中)將李小龍親筆簽名嘅荷里活合約珍藏捐畀保釣委員會,由代表曾健成(前右)及陳妙德(前右二)接受。(保釣委員會提供)