政壇:政商定格:白雪仙北上撐林順潮

本港眼科權威、全國人大代表林順潮醫生多年來大力推動健康快車、亮睛工程等慈善服務,為內地貧苦大眾治盲掃盲,加上醫治過嘅星級名人無數,佢透過CEPA喺深圳成立首間港資獨資嘅眼科醫院,尋日正式開張,除咗香港特首梁振英同深圳市市長許勤等高官外,連影業大亨鄒文懷、中大校長沈祖堯、商台行政總裁陳志雲同粵劇名伶白雪仙都係座上客。仙姐話十幾年前已開始搵林醫生睇眼,坐喺旁邊嘅「影迷公主」陳寶珠就話經仙姐介紹下做埋林醫生「客仔」,定期驗眼確保視力健康。

太太李肖婷尋日就帶同一對仔女嚟撐場,已經三歲嘅細佬昭博十分好動,一見到爸爸就飛撲埋去,林醫生抱起佢時就直頭好似樹熊上身,又攬又錫,五歲嘅姐姐昭悅就比較斯文,一直跟住喺爸爸身邊,兩姊弟一啲都唔怕陌生人,畀大班記者圍住影相都冇扭計。

第一手消息請下載on.cc東方互動iPhone/iPad/Android/Windows Phone Apps

林順潮仔女,個樣同佢一個餅印咁。(蕭毅攝)