SUN搞作：打橫嚟講：信香港人吧！

人類的智慧，是經過幾十億年時間，沉澱積累而成的。

中國諺語裏，含着卓見睿智，是人類黠慧之菁華，唔信？古諺有云，「新官上任三把火」，即係起初時，總係威係勢，扮晒勁，好有嘢咁！隨之，打後，有無料到呢？將來先至算囉！

新人事新作風，又大鑼大鼓吹奏一通，講盡超偉大理念，甚麼中國夢、夙夜在公、又或反腐削權，壯士斷腕，豪情蓋天的呼喊，叫人想起十多年前朱鎔基的買定棺材對付貪官，家下又點呢？國庫咪被人千億千億的掏個不亦樂乎囉！

哼！國家大事，離港人太遠，觸不到、管不了，返番嚟香港的自身問題吧！有關「普選」，本有《基本法》規定，唔知道因乜事硬係要諸多留難，祭出荒謬的「愛國愛港」政治關卡，並設定一個「篩/預選」的假普選審查，逼港人接受。多事之徒再三表示，若選出推翻中央政府的人做特首，是不切實際咁話，真係得啖笑！

全球的地方首長選舉，都不一定要係國家執政黨的同黨，例如台灣不少縣市、美國的州市長，也多是反對黨主理的，這有利不同黨派交替執政，及監察政府施政，有利民生和國家發展！

香港特區只是中國境內的一小屬土，無論如何也做不出甚麼叛國之壯舉啦！泱泱大國應該對自己有信心，對港人有信任，故不要再信有利益衝突的代言人啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府