政壇：政商定格：霍麗萍閒時最愛打書釘

逛書局、打書釘係人生一樂，已故全國政協副主席霍英東嘅長女霍麗萍（Pat）都好此道。前日下午五點鐘放工時間，佢現身銅鑼灣一間書局，阿Pat興趣廣泛，除咗佢專長嘅攝影藝術外，對其他類別嘅書籍都好有興趣，例如佢行經陳列社會人文學科嘅書架時，就被一本講述單身現象嘅英文著作吸引，於是拎起本書搵個座位，同一般打書釘嘅街坊冇乜分別。

睇咗十分鐘左右，佢就走上賣旅遊書籍嘅樓層，搵到一本講喺印度尋訪佛陀足迹嘅旅遊書，佢睇得津津有味，唔通佢打算去印度旅行，影番輯沙龍？阿Pat話目前未有計劃，只係剛巧有空閒睇書參考吓啫。佢又話閒時逛書店呢個習慣早在放洋留學期間已養成。呢日佢除咗買咗旅遊書籍外，仲揀選幾本有關宗教哲學嘅著作。