政壇：政商定格：Jack蘇北京滑雪扭傷腰

貿易發展局主席蘇澤光（Jack蘇）尋日以電影發展局主席嘅身份出席個發布會，公布撥款資助新進導演拍攝處女作，但佢上台致詞時，竟要求工作人員擔櫈畀佢坐低發言，佢解釋早前滑雪扭親腰，唔方便企咁耐。

佢喺農曆新年期間去咗北京郊區試玩新滑雪場，點知扭傷咗，搞到尋日要負傷上陣。同場仲有電影發展局基金審核委員會召集人王英偉，雖然佢卸任咗浸會大學校董會主席，但仍然力撐浸大同政府隔空爭取九龍塘前李惠利院校地皮。佢透露，雙方自○九年起就地皮去向一直有商有量，直至政府月前喺毫無先兆下，突然申請將地皮交畀城規會更改土地用途，浸大當然火滾啦。