政壇：搞搞政：黃錦星教路慳電抗加價

環保係一種習慣，亦係一種文化，環境局局長黃錦星（KS）被視為環保人辦，佢個人生活好環保，平均每日只係使用一點五度電，好多城中人都頻呼冇可能，實在唔係一般人可以做得到，KS尋日出席一個青年領袖高峰論壇時，勸喻青年人慳電，仲話識慳電就唔使驚電力公司加價囉。咁講，使唔使點蠟燭照明、燒柴火取代電器煮食呢﹖

佢宣傳慳電雖然有正面意義，但慳電同對抗電力公司加價係兩回事，青年人慳電可以保護環境、減少能源消耗，但唔代表社會任由電力公司加價o架嘛。勸人慳電之餘，KS都宣傳一啲名人嘅環保做法，佢話其實有好多人都好慳，好似導演李安無論喺公司定拍外景都會避免用即棄餐具同樽裝水。

KS尋日講咩都會自動拉到去兩電利潤管制中期檢討，睇嚟呢個問題都搞到佢幾心煩，就連活動後有記者問佢點睇中華煤氣下月加價，佢都不厭其煩提醒大家，要認清目標，聚焦兩電中期檢討，以至兩電能源組合可以做到環保同價格平衡喎。佢咁講已經有所暗示，大家收唔收到﹖