政壇：象哥開會食話梅驅睡魔

金融服務界議員張華峰參加上屆政協會議時畀人影到佢瞌眼瞓，搞到瞌眼瞓形象深入民心。尋日佢同傳媒聚會時就話，佢驅趕睡魔嘅妙法係不斷飲水，只係飲完又會有需要去洗手間嘅麻煩。依家成日喺立法會開會冇時停嘅佢又話，唔少議員都有秘方驅睡魔。

好似進出口界議員黃定光（象哥）開會時會食嘢，如食話梅同餅乾：「大象一食話梅就醒晒！」嘩！開會就食嘢，象哥已經係超磅一族，咁食法身形會唔會好快同張華峰「體」齊？工聯會議員黃國健就話過佢以沖普洱茶提神。

最近政改議題熱烘烘，張華峰話金融服務界多數贊成擴闊選民基礎，例如依家全港約有一千個證券負責人，如果佢哋都可以投票，咁議員就更有代表性，同政府講數時更有牙力。佢仲話業界都普遍贊成，如果要做嘅話，相信二○一六年立法會選舉都做到喎。