政壇：陳家洛變問題中年

財政預算案發表後，立法會議員都會就帳目問題提問跟進，呢個議會傳統操作今年有變本加厲之勢，新一屆立法會議員已陸續提交問題，質詢總數超過五千條，破晒往年紀錄，政府中人真係要做好答到昏天暗地嘅準備。公文袋議會新丁陳家洛就透露，淨係佢一個人都提咗五百多個問題，數量嚇親人，但多唔一定叻，更唔代表勤力，最多只係代表佢係「問題中年」啫，而佢致力狙擊嘅對象就係教育局長吳克儉（吳得掂）同中央政策組首席顧問邵善波。

誓剷走中策組

陳家洛有四位千金，佢本身又做教育，唔知係咪答問題答得多，佢都變咗「問題中年」。據了解，佢勢成今年提出最多質詢嘅議員。問佢點解咁多為甚麼，陳家洛話其實佢嗰五百條質詢咩範疇都有，但主要就係教育同有關中央政策組嘅問題，單單係教育佢就提出咗約二百條質詢。而佢仲會就預算案提出修訂，要求減吳得掂一年嘅人工同福利，要佢做義工，同埋削減唔知做咩嘅中策組一年嘅開支，誓要剷走中策組。

陳家洛矛頭直指吳得掂同邵善波，唔係無端端嘅，佢話，吳得掂喺德育及國民教育科搞到一鑊泡，十五年免費教育方面明明已經有四萬幾個家長同教師簽名支持，都仲唔向政府攞錢推行，仲有李惠利校舍地皮問題等，好應該畀吳得掂一啲小懲大戒，扣佢一年人工同福利喎。

除咗要吳得掂做義工，陳家洛仲話佢會就十五年免費教育向全港嘅幼稚園發信，搜集佢哋嘅教師學歷、薪酬、學校租金等資料，再做研究，要同對方鬥快鬥好，畀啲壓力吳得掂咁話。