SUN搞作：少膽虫手記：回顧虫生

每個人喺人生嘅唔同階段，都會回顧自己嘅過去。少膽虫都唔例外，入咗壹全霉都十幾年喇，諗番十幾年嚟嘅路，屈辱嘅多、開心嘅少。有好多人都話，出身喺香城，無論你屋企富貴定貧窮，都等於含住金鎖匙出世，因為至少香城人有選擇嘅權利。

少膽虫細個嗰陣，曾經相信呢句說話，每一晚打開電視，都係勵志嘅連續劇、講獅子山下精神嘅廣告，令到條虫覺得前路滿希望，社會上面大把機會。然而，慢慢長大，少膽虫就發現，呢個係一個天大嘅大話。唔好講條虫嗰代喇，就拎新一代嚟講。審時度勢，社會上面，根本無乜機會。一個大學畢業生，出嚟多數搵嗰萬幾蚊，畀得家用嚟唔夠食飯，搭多幾程車，啲錢就唔夠用喇，拎《爛果》做例子，淫黎最鍾意就係請呢班廉價勞工，貪後生仔捱得又易控制。啱啱出嚟嘅後生，多數幫老細印下文件做雜務，無乜嘢學到，青春就咁浪費晒。

又再講吖，喺香城你想做個藝術家、作家，或者好似李安咁拍戲，多數人都會一句得埋嚟：「你食懵咗呀？」社會大眾認為呢類理想不切實際，而真正要入行，條路亦都好窄，正苦又無投放到啲咩資源畀班後生。香城，點都唔係一個尋夢嘅理想地方，結論係所謂嘅機會，只係得個講字。

條虫當日一畢業，都曾經追逐自己嘅夢想。當日踏入壹全霉大門，少膽虫斷斷估唔到要出賣良心！今日，條虫已經再無良心可言。廣大嘅讀者，少膽虫好痛苦！

少膽虫