政壇：搞搞政：撥款區會受阻曾德成變冇水局長

施政報告提出向十八區區議會撥款二十億元做「社區重點項目」，但泛民主派一直擔心計劃會變咗建制派嘅「蛇齋餅糉」式活動，搞到當局要將區議會提交項目建議嘅死線，由三月底押後至暑假，望趕及十月新立法年度復會後闖關申請撥款。但泛民到時會否又玩拉布就冇人知喇！民政事務局負責睇住區議會盤數，德成局長會唔會變冇水局長？真係要驚吓喇！

現時十八區區議會大部分由建制派主導，據聞有個別泛民中人已打算用「拉布」作「秘密武器」，官場中人都唔敢怠慢，研究將撥款案「分拆上市」。消息指，港府想喺今年七月中前先申請二億元可行性研究撥款，然後喺暑假期間收集各區議會嘅項目建議，等待立法會十月復會時，盡快排隊向立法會工務小組及財務委員會申請餘下十八億元項目撥款，目標最快可於明年首季或年中開始就工程項目動工。

但喺拉布戰陰霾下，有人估計泛民會以監察公帑運用為由逐項拆審議，如每個關卡拖番兩、三個月，想喺二○一五底前完成所有項目幾乎係不可能嘅任務。