政壇：立會足球賽泛民齊甩底

立法會議員足球隊尋日同一班外國駐港領事代表踢友誼賽，多名報咗名會出戰嘅泛民議員集體甩底，剩低五名建制派議員曾鈺成、梁志祥、陳克勤、何俊賢（高佬賢）同郭偉強加埋班外援落場，唯一泛民隊員「長毛」梁國雄就遲大到，佢一落場就差啲擺烏龍幫領事隊入波。所以話泛民勾結外國勢力都唔係冇根據o架！

議員隊同領事隊尋日相約小西灣運動場開戰，高佬賢開波五分鐘就入咗第一球，之後唔小心仆咗落地，撼親個頭，搞到「短暫失憶」要抖一抖。老而彌堅嘅梁志祥就幫議員隊入多一球，加上外援入嘅兩球，議員隊最後以四比二戰勝領事隊。全場最矚目係下半場先加入嘅長毛，佢一入場就帶住個波喺咁衝，如入無人之境，皆因佢衝向嘅係議員隊嘅龍門，幸好有人醒水中途截咗佢個波，唔係就失禮死人喇。