政壇：馬唯中淡掃蛾眉搭港鐵

本報尋日獨家直擊台灣第一千金馬唯中前日現身香港、遊小巴河去香港大學美術博物館參觀後，尋日又發現佢由堅道寓所行路到中環港鐵站，然後搭港鐵去灣仔萬麗海景酒店，唔知係咪約咗愛郎蔡沛然周末撐枱腳呢？沿途有唔少市民圍觀同用手機向佢拍照，但馬唯中全程無回答任何提問，但就好有禮貌多次講：「謝謝！你們辛苦了！」

早上十一時許，馬唯中離開寓所，佢依然一身簡樸黑色衫配牛仔褲，頸繫黃色圖案嘅絲巾，而且明顯化咗個淡妝。佢由堅道寓所行落中環港鐵站，約行十五分鐘，到站後佢好熟悉咁為八達通卡增值，然後入閘乘車，兩個站後喺灣仔站落車，再步行往會展方向，約十二時抵達萬麗海景酒店。期間唔見愛郎影蹤，下午三點半鐘，馬唯中就獨自返到堅道寓所。