政壇：貪曾遊台耍官威

因為貪盡海陸空而被廉政公署調查嘅前特首「貪曾」曾蔭權爵士，可能因為冇得做全國政協副主席好心噏，上周二同老婆避走台灣散心。期間，貪曾兩公婆神出鬼沒玩低調，行蹤鬼祟神秘，玩足五日四夜之後，尋日下午三時正，終於現身桃園國際機場。原本貪曾臉帶笑容，但發現我哋在場之後，先係呆咗幾秒鐘，回過神後即刻返轉頭想走，反應咁驚青，唔通做咗乜嘢虧心事？

「太監扮皇帝」冇人識

貪曾喺台灣「失蹤」咗幾日後，尋日喺隨行嘅G4（保護要人組）及幾名接待人員陪同下，抵達中正機場出境大廳。貪曾慣咗晒排場、耍官威，今次又係同早前去江蘇玩咁，浩浩蕩蕩一行人，有啲人幫佢開路，有啲人就幫佢推行李，咁大陣仗，想唔被人發現都幾難。問佢呢幾日去咗邊度玩？對台灣有咩印象？貪曾一句都唔答，保安人員一邊阻撓及阻擋我哋嘅鏡頭、一邊護送佢急急腳行到去國泰航空頭等艙櫃位。

期間機場及地勤人員加入協助行列，將貪曾夫婦兩大箱行李寄艙，然後喺三位拎住對講機嘅職員帶領下，行色匆匆搭乘扶手電梯，直上一層辦理出境手續。送走呢位瘟神之後，我哋問有份為佢殷勤服務嘅機場職員及航空公司女職員，知唔知呢位貴賓係邊個？結果竟然冇人識。貪曾亂港多年，自以為係威係勢，其實離開咗香港，知名度低到接近零，認真羞家，難為佢仲唔知醜「太監扮皇帝」出巡。

傍晚約六點鐘，貪曾乘搭嘅國泰班機抵達香港機場，佢同太太喺貴賓通道行出來，我哋再問佢幾時到廉政公署協助調查？佢都係冇反應，木無表情咁捐上座駕，驅車直奔住所。話時話，貪曾出名孤寒兼縮骨，點解佢咁捨得坐頭等客位呢？以私人身份坐頭等艙位去訪問台灣就更加冇人信啦！莫非佢用番以前喺政府儲落嘅飛行里數？抑或厚住臉皮要求航空公司提升佢坐頭等艙位呢？