SUN搞作:少膽虫手記:出trip畀人打

少膽虫已經有三年無離開過香港喇,真係好想出去透透氣。撞啱之前有位記者要北上強國做實地採訪,點知臨出發肚痾,又由於《爛果》好多記者都辭晒職,逼於無奈,少膽虫惟有出山帶埋另一位攝記勇闖強國。雖然去強國同落地獄無分別,但係都總算畀少膽虫一個離開香港輕鬆吓嘅機會。

少膽虫嘅任務係採訪一位被軟禁嘅戰士,但以條虫吞Pot嘅性格,當然諗住去現場影幾張相交貨就去揼骨啦。去到訪問地點,《爛果》攝記即刻發揮獨有嘅「照妖鏡」技能──快速偷拍。殊不知突然有人從後用袋笠住佢同條虫個頭,繼而拳打腳踢,邊踢邊罵:「你他媽的香城記者懂不懂規矩啊!不報上名來就殺掉你!」少膽虫聽到有危險,嚇得快要尿出來了,不顧一切大叫:「《爛果》──!」

然後對方靜咗幾秒,少膽虫心諗,難道淫黎咁勁,無人敢郁佢啲?然後有把聲懶懶閒咁講,「打那間老作集團的狗真浪費氣力。」少膽虫聽住呢個人嘅腳步聲遠去,同攝記兩個爭扎扯爛身上面嘅麻包袋,不遠處有堆拎住三種顏色攝錄機嘅同行都畀人狂打緊!少膽虫同攝記驚小命不保,梗係速遁。

返到酒店遇到唔少同行,條虫偷聽到成班人都係咁討論有記者畀人打嘅事。少膽虫不禁沾沾自喜,自己雖然唔算識好多人,但估唔到咁多人關心自己o架喎!然後突然有人好憤怒咁係大堂講咗句:「都唔明!拋個身出嚟做好事都畀人打!啲垃圾公司……好似嗰份乜鬼《爛果》咁,日日不務正業,以改圖攻擊對手為樂,就可以unun腳等開飯!呢個世界癲架!」

少膽虫即刻扮聽唔到。

第一手消息請下載on.cc東方互動iPhone/iPad/Android/Windows Phone Apps

少膽虫