政壇：政商定格：蔡加敏靚袋未失好開心

尋日喺馬場遇到「玩具大王」蔡志明長女Carmen蔡加敏同老公馬鴻銘，Carmen開設嘅名手袋店日前遭「快閃賊」爆竊，險失價值五百萬元嘅靚袋，佢話當時都好擔心會損失慘重，幸好警方極速搵番晒啲贓物，笑言要畀香港警隊十個叻。經此一役，佢話店舖會進一步加強保安，以防案件重演。

又再懷有六個月身孕嘅Carmen早前舉家去新加坡同馬來西亞玩，去咗Legoland參觀，平時少玩積木嘅大女靄翹都玩得好盡興。佢又話一對孖仔誠禧同瑋禧精力旺盛，周身郁冇時停，將來打算畀囝囝學跆拳道強身健體。

海皇粥店集團執行董事蕭楚基亦嚟撐佢有份嘅團體馬「黃金年代」，雖然只跑第三，但有錢分一樣開心。佢大爆集團將開拓西餐路線，首間分店於年中坐落東涌，主打休閒歐陸風格，冀吸引飲咖啡嘅中產客喎！