政壇：政商定格：曾鈺成被遺忘變壓軸嘉賓

胡志偉嘅立會議員辦事處尋日開張，負責「醫食住行」嘅局長都畀佢請晒，食物及衞生局局長高永文同運輸及房屋局局長張炳良主禮，連立法會主席曾鈺成都畀面出席，可惜佢好似一度被遺忘，但原來有原因嘅。

做咗咁多年區議員，終於有首間立會議員辦事處，佢特登着番套西裝梳個靚頭賀一賀。張炳話識咗胡志偉十幾年，睇住對方由市政局議員到今日做咗立會議員，當然戥佢開心，所以平時「好少企街」嘅佢亦要到場致賀。

主禮嘉賓有十位，賀詞都要致十次，但主持一時忙亂，差啲遺忘曾鈺成，好彩呢位立會主席最後獲安排壓軸致詞。但去到送紀念品環節，主席又再次冇份。志偉後來同我哋講，其實佢全體立會同僚都有邀請，冇特別邀請曾鈺成，所以主席出現，佢覺得好驚喜，但就因為咁，冇預紀念品畀佢。