政壇：搞搞政：官場廣傳貪曾抗疫臭史

沙士十周年，驚現新沙士，但沙士以外，香港近年嘅抗疫史仲有○九年嘅豬流感。近日官場中人重溫豬流感一役時發現，當年嘅「戲劇性」絕對不遜於沙士，之唔係因為有貪曾囉。

擺架子鬧常秘 當自己皇帝

○九年五月一日，貪曾宣布香港出現首宗確診人類豬流感個案，仲史無前例將病人入住嘅酒店封鎖，同時宣布親自領導一個跨部門應變督導委員會抗疫。傳聞委員會頭一兩次開會就唔多愉快。話說有次貪曾喺開會前，見到有記者在場外守候，一入到會議室就大發雷霆咁問點解外面有記者，仲眾目睽睽成個file揼落枱面，拋低一句「你哋開啦，我唔開喇！」就轉身離去。

呢個委員會係要廣納同統籌不同意見，但傳聞當年貪曾開會時講得最多嘅就係「唔得！」、「唔好！」同「唔做！」總之啱聽嗰句就聽，唔啱聽嗰句就半句都唔入耳，搞到唔少公務員都好谷氣，極沮喪。

喺一次特別會議上，時任食物及衞生局常秘李淑儀曾因直諫不果，被貪曾擺架子大罵一句「Who do you think you are talking to？」（你知唔知自己同緊邊個講嘢？）最後要同場嘅一位司長打圓場，而時任食衞局局長嘅周一鑊就沉默隔岸觀火。呢句經典對白，會後喺公務員之間廣傳開去，個個都聽到擰晒頭，都話：「佢以為自己係皇帝咩？」