政壇：做政府官員首要學縮寫

要做官，所屬政策局範疇嘅政策當然要熟讀，仲有啲資料非懂不可，講緊嘅係一大堆涉及人名、職位同用語嘅縮寫，因為呢樣係政府內部共通語言，否則同政府同事根本「雞同鴨講」。有知情人士話呢一大堆縮寫開會同文件嘅行文都會用到，好似各政策局都有縮寫稱呼各級官員，所以唔識嘅話根本唔知邊個打邊個；另一方面，依家好多政策都屬跨部門共同推動，所以要熟知十多個政策局嘅縮寫，好似政制及內地事務局英文縮寫係「CMAB」，民政事務局係「HAB」等。如果將呢啲「入門」集中起嚟編成一本「手冊」，原來有成八頁紙咁多。