政壇：名人醫生齊玩野外定向

無國界醫生野外定向尋日朝早喺沙頭角舉行，吸引三千人參加外，高官、名醫亦組隊拗手瓜。為爭勝各師各法，立法會議員范國威、莫乃光同人稱「鐵人」嘅無國界醫生救援人員歐耀佳組成「活力救援隊」，佢哋趁台上嘉賓致詞時，已急不及待「刨」地圖，比賽一起步，歐、莫及范三人就一支箭飆去搵Check Point「打卡」。Check Point擺得好隱蔽，范國威都有本事搵到，最終「活力救援隊」大熱勝出。

挑戰佢哋嘅其中一隊係由食衞局副局長陳肇始、政助陳岳鵬同徐英偉組成嘅「政能量隊」。徐英偉同陳岳鵬表現神勇，原來兩人係「老手」，但兩位猛男不忘照顧陳肇始，上山落斜時，總會伸手拉對方一把。玩到攰攰哋，見街邊檔賣緊新鮮「菠蘿冰」，三人齊齊整番條歎吓添！