政壇：愛港之聲創會暢遊新界

因元旦日搞嘉年華撐政府而嶄露頭角嘅「愛港之聲」尋日終於宣布正式成立，但成立大典竟然選址大埔屋邨酒樓，一百二十名會員飯前飯後更分別參觀大埔海濱公園同屏山文物徑，當正參加新界一日遊，莫非愛港之聲都靠「蛇齋餅糉」籠絡市民？召集人高達斌強調位位實收一百二十五元，一毫子贊助都冇，同枱會員亦展示團費入數紙，澄清絕對冇收着數，旨在聯誼。

成立大典相當熱鬧，百幾人坐滿十圍枱，即使未有會址同全職職員，亦已選出多位內閣成員。高達斌話愛港之聲至今已有逾八百人加入，喺社交網站向佢哋「讚好」嘅亦逾千人，未來會考慮收取年費平衡收支，強調背後絕冇「金主」。