政壇:鬍鬚曾得罪埋基層

財爺鬍鬚曾早前「冒認」中產,仲話中產最愛飲咖啡同睇法國電影後,已經傷盡本港中產嘅心,估唔到咁都嫌未夠,尋日仲傷埋一眾基層市民嘅心。話說鬍鬚曾喺網誌自爆,自己做過基層市民,當年喺美國讀大學時,曾經去地盤做暑期工,畢業後又喺老人中心做「專業打雜」,講到自己好似明白基層市民諗乜咁。

鼓勵青少做水手

鬍鬚曾話當年喺美國雖然主修建築,但冇去名牌企業做暑期工,反而去咗地盤做建築,最難忘係每日拎住塊七十磅嘅石膏板,由地面搬到樓上。就算畢業後都喺老人中心打工,由洗地、送飯、幫老人家填表都一腳踢,做完「專業打雜」又試過去學校教書,最尾先回流返港打政府工。

就因為佢咁講,大家先驚覺佢做過咁多基層工作,但佢到依家都不知民間疾苦,食米唔知米貴。如果佢知道基層活喺水深火熱之中,預算案就唔會只得一次性措施,亦唔會豪花幾百億擺喺林林總總嘅基金度啦!枉佢做過咁多份基層工,都諗唔到新橋,只係識得炒冷飯。呢啲咪叫做頭大冇腦、腦大生草囉!

講開打工,鬍鬚曾繼續發表謬論,佢話後生仔應該多嘗試「核心商業區」以外嘅發展機會,例如投身海運,不過唔少後生仔都擁抱「中環價值」,先冇諗到行呢條路。又話要吸引年輕人做水手,一定要做足宣傳工夫,建議電視台搵明星扮演「英氣船員」,拍番套「海員」劇集。因為行船好有戲劇性,海上有颱風、海盜、鯨魚、海豚作伴,或者可以吸引到年輕人入行喎。

其實佢真係一啲都唔明白年輕人心態,佢哋鍾意投身邊行,最緊要係睇有無前景,如果前景灰暗一片,拍幾多套電視劇都冇用啦。

第一手消息請下載on.cc東方互動iPhone/iPad/Android/Windows Phone Apps

設計圖片及對白