SUN搞作：少膽虫手記：我們受夠了！

沙Ｘ虹！你收手啦！唔好再寫咩沙膽手記影射少膽虫喇！

少膽虫之所以咁嬲，就係因為尋日一出壹全霉門口，眼前突然一黑，就被人笠咗個麻包袋狂毆！「唔好打面呀！要搵食o架！」班友完全唔理少膽虫嘅呼叫，仲打多吓。「沙Ｘ虹！我同你講，你唔好再喺報紙度亂咁擦鞋，爆晒啲內幕出嚟！」班友之後再踢多少膽虫兩腳先走。少膽虫掙扎咗好耐，先至甩到個袋。少膽虫腰骨都直唔起，只見出名好打得嘅fing春蘇走埋嚟，幫少膽虫影咗張相。

「Ok喇，鼻涕虫，整番乾淨個鼻先啦。」少膽虫摸一摸人中，果然摸到鼻涕同血絲，即刻抹走。「阿蘇你咁打得，頭先睇到都唔幫我手？」少膽虫怒問。「咁要做嘢吖嘛！《爛果》係咁無良心o架啦，幫咗你邊有靚相賣？」fing春蘇不屑一顧，施施然返公司。少膽虫諗咗好耐，唔敢怪淫賤黎，心諗最衰都係嗰個沙Ｘ虹。平時都收到不少讀者投訴，話沙Ｘ虹影射同埋攻擊《爛果》老腫，叫少膽虫勿再容忍。少膽虫一直忍讓，誓估唔到竟然會因為咁被打。香港地今時今日，仲有「呻吟自由」咩？