Sun奇古怪：Sun潮語：【圍揼】

關乎中國未來五年，甚至十年發展嘅人大兩會正於北京召開，全國軍政商要人都雲集京城。喺呢個重要時刻，通常整個京畿皇城都守衞森嚴，就算你有大內密探保龍一族咁嘅身手，都要乖乖哋聽話，休想可以亂嚟。偏偏就喺呢個時候，香港有位真心愛國社運人士、保釣船長楊匡竟然硬闖北京，探望被軟禁緊嘅異見人士劉曉波之妻劉霞。當楊勇士去到劉霞住所附近，正想突破封鎖硬爆上樓之際，突然就有幾個完全唔知咩身份嘅疑似保安員物體，傾巢而出粗暴阻止，仲二話不說對隨行採訪嘅香港記者拳打腳踢，可憐幾位緊守工作崗位嘅記者，慘被「圍揼」!有香港電視台新聞攝影師拍下「圍揼」嘅片段，有片有真相，但當地公安竟然無拘捕打人者，反而要記者們去公安局立案！呢啲情形，真係幾多GDP都掩飾唔到荒謬!

潮語「圍揼」嘅意思，相信都唔使多作解釋。大家睇睇以上事件，嗰班喺劉霞寓所外身份不明人士，招呼香港傳媒嘅毆打行為，就係潮語所講嘅「圍揼」。「圍」即係成班人圍住少數人，「揼」即係用拳頭當錘仔咁 「揼」。 「圍揼」本來係社團界用嚟對付敵人嘅手段，當然好多中學生亦都鍾意「圍揼」一啲較為孱弱嘅同學仔，相信你中學時代都可能被「圍揼」過或參與過「圍揼」。

「圍揼」除咗形容毆鬥行為外，其實仲有另外一個意思，就係大家一齊去做一件事或完成一件工作都可以叫做「圍揼」。例如一班廣告人一齊度橋，又或者大班編劇一齊度古仔都可以叫做「圍揼」。當然，好似強國神秘人撲出嚟「圍揼」記者呢件事，真係比編劇度出嚟嘅古仔更離奇。今時今日強國又話係大國又話要與國際接軌，竟然發生一啲咁唔文明嘅「圍揼」傳媒時件，真係令人失望，希望當局可以徹查事件，還香港記者一個公道。