政壇：搞搞政：范國威罕有變咗保皇派

港府宣布出境限帶兩罐奶粉嘅政策後，喺內地同香港引嚟好多反對聲音，新民主同盟立法會議員范國威（Gary）一直支持捍衞本土，尋日罕有咁變咗保皇派，掉轉槍頭，支持政府實施「限奶令」，更公然與公民袋同白鴿黨為敵，反對訂立「日落條款」嘅建議，佢仲話「我冇理由又反對咁冇政治道德o架！」

反對就係冇政治道德？Gary呢句說話似乎擺明暗寸口口聲聲維護港人權益，但又反對禁令嘅政黨同議員。佢話，自己早就向政府建議實施限制奶粉出境嘅措施，依家政府終於行動。

尋日佢位於粉嶺華明邨嘅議員辦事處開幕，現身撐場嘅仲有教協理事韓連山，原來佢同Gary一直有段不為人知嘅半師生關係。退休前任教天主教慈幼會伍少梅中學嘅韓連山自爆，八十年代Gary係該校嘅學生，Gary喺學生時代已不時幫學生會設計宣傳海報，唔怪得Gary去年憑淋紅油抗赤化等出位招數，成功殺入立法會喇！