政壇：飲食達人醉心陶藝

飲食達人余健志（Jacky Yu）擅設計菜式，但原先從事廣告創作嘅Jacky投身飲食業之前，就醉心陶藝，仲覺得若巧手佳餚配以精美嘅陶藝器皿，就如畫龍點睛，於是拜師學陶藝，依家佢屋企嘅杯盤碗碟都充滿獨特個性同品味，親友觀之無不拍掌讚賞。

Jacky亦曾經與陶藝導師製作一批餐具器皿供旗下菜館使用，弊在有客人要求帶走例如筷子座等物件作留念，一啲洗手間嘅小花樽又被人順手牽羊，無奈之下，Jacky都要改用工業生產嘅陶瓷器具，而私伙手製陶器就留番畀識貨嘅客人。