政壇：泛民掹衫尾佔領中環

北京開緊人大政協兩會，本地政圈嘅焦點都轉移晒去京城。泛民政黨不甘寂寞，但又發動唔起乜話題，白鴿黨嘅何俊仁日前就另闢蹊徑，揚言必要時會接受及參與佔領中環行動嘅建議，請辭超級區議會議席，變相發起另一次全港選舉。鐵頭仁呢頭講完，公文袋嘅梁家傑第日已經跟上，擒擒青話，佢十多日後都會同發起「佔領中環」行動嘅港大法律學者戴耀廷會面，傾吓可以點樣配合。泛民兩大政黨喺爭取香港政制發展上唔係無心無力，就係嘥氣嘥力，家吓更驚住被隱形或邊緣化而出掹衫尾嘅招數，真係夠晒肉酸！

鐵頭仁揚言請辭

由學者倡議嘅「佔領中環」行動，近日被坊間廣泛討論，唔同嘅人有唔同睇法，不過，比較共同嘅睇法就係，呢個行動嘅核心似乎唔係傳統所見嘅泛民政黨、政團，反而係市民（據講會有一萬個人）作主角，件事點樣發展仲未知，但泛民兩大政黨嘅反應就有啲搞笑。

先係鐵頭仁話，今次情況同五區公投時唔同，必要時願意辭去佢個超級區議會議席，引發一次全港性選舉。事隔一日，當日懶理民意發動五區公投嘅公文袋，就由黨魁袋巾傑擺姿態，話會喺二十一號同戴耀廷會面，了解吓可以點樣配合「佔領中環」嘅行動喎，佢仲話忍無可忍、退無可退嘅時候會配合行動。呢番表態真係不乏酸咪咪之意，好多人仲會奇怪，白鴿黨話響應，因為佢哋有兩席超級議席，公文袋有乜呀？佢哋又冇超級議席，今次即使引發一次全港性選舉，都唔係佢哋當年嗰種所謂公投喇。

睇番轉頭都覺得好諷刺，公文袋發動五區公投時，好多泛民中人都唔支持，更出手杯葛，今時今日，由學者發起嘅行動，政黨變晒配角，佢哋真係要好好反思吓對香港政制有乜幫助呢？