SUN搞作：打橫嚟講：臭熏天的藝評醜事

一件好事，搞到臭過大陸屎坑，除了辦事人能力庸廢之外，也因過程中有太多黑暗的人為缺失，包括利益分配、弄權好功、用人唯親、私相授受、隻手遮天、借花敬佛，以至貪贓枉法都有之，歷史上，這類劣行屢見不鮮。

香港藝發局舉辦首屆「藝評獎」，一出手就火羅味熏天，遭全港文藝界狠批，至昨日為止，只得藝發局自己人兩三篇自圓其說的片面回應，答不中重點之餘，仲用了拉埋其他受資助的團體落水，這以別人裙腳冚自己爛腳的賤招，換來更叫人反感的痛罵及追擊，令本來嘅臭事，更臭！

惹人討厭的藝發局主席王英偉，口口聲聲話「不容有人隻手遮天」，但佢早前透過揸莊的「校園藝術大使計劃」推薦自己個仔王梓軒個人演唱會，還毫不避嫌咁免費派飛，至家下，仲未有合理解釋過喎！想不了了之？平機會好應派周一嶽去做嘢囉！

好啦！呢單被全港文藝界定性為「自己人益自己人」嘅藝評獎，如果真係清白嘅，無黑箱作業嘅，要大眾釋疑的話，最佳方法，就係公開評選過程細則，並將六十份入圍作品，不記名的讓大家見識，佢哋輸乜嘢？並等啲人有例可依，下屆唔好犯同樣的錯！仲有，應叫齊六名評審、得獎者（或所有參賽者）與公眾來一次藝評交流會，研究一下香港藝術界將來之路，好過現在各說各話。最後，藝發局必須回答的，是上述六位評審是如何招攬回來的，他們有何資格做評審？因我見其中有一位，連做小學生勞作打分的資格也沒有呀！有傳佢品格有問題，做過啲無誠信嘅失德劣行呀！真臭熏天！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府