政壇：政商定格：東華高層出招救天秀墟

台北經濟文化辦事處日前舉行春茗酒會，一日趕幾場嘅東華三院主席Viola陳文綺慧就孖住東華執行總監Stephen吳志榮現身。講起東華營辦嘅天水圍天秀墟開張近一個月，人氣同成效唔係咁理想，Viola話佢哋已經度緊橋急救，包括邀請營商專家開班教檔主點樣做生意，仲唔排除由副主席同總理們親自出動添！

雖然Viola今個月底任期就屆滿，但佢好緊張天秀墟嘅經營，當晚密密同Stephen了解最新情況。佢同記者講，當年中環某大型商場開幕時都冇人租，所以佢有信心最終搞旺個墟市咁話。Stephen就話東華董事局有好多大老闆，大家度橋多管齊下容易搞掂。佢哋初步打算搵成功商人開班過兩招，亦會請專家講吓市場理論，等班小檔主掌握做生意嘅理論同埋實務，提升市場觸覺，咁就唔怕貨品冇吸引力喇！