政壇：搞搞政：政團鬥水民協肥佬攞頭獎

港大民意研究計劃尋日發表十大政治團體評分，民協首次以四十九點九分榮登榜首，排第二同第三嘅就分別係職工盟同工聯會，而街工同工黨就因為認知率唔夠其他政黨高而被剔出十大。

雖然調查結果令人摸不着頭腦，但原來連立法會議員KK馮檢基都接受唔到自己個細黨知名度高過其他大黨。喺排行榜公布後唔夠幾個鐘，佢喺社交網站上載一張背景係黃色嘅個人單頭照，隔籬仲大大隻字寫住「嘩！係真唔係呀？」六隻字，好似今次嘅評分同舊年佢爆冷贏到超級區議會一樣咁出人意表。

不過，睇真啲個調查結果，就會發現民協成為十大政團之首呢個結果有唔少發水成分，事關今次所有政黨評分無一合格，即係肥佬之餘，街工嘅得分仲要比民協高出兩分有多，而排第二嘅職工盟只係比民協少零點四分。所以今次民協之所以獲得如此「佳績」，只可以話係「蝦兵鬥蟹將」，比其他政團好少少咁大把，奉勸KK唔好因此而得意忘形。