政壇：周一鑊翻閹靠厚顏無恥

平等機會委員會主席遴選過程一直都被民間團體鬧爆係黑箱作業，上星期宣布委任「廢官」食物及衞生局前局長周一鑊出任平機會主席，不但進一步深化平機會喺「高官退休俱樂部」嘅形象，翻閹「平機零經驗」嘅周一鑊亦實在反智。

自主席遴選委員會去年九月成立以來，傳出嘅主席人選不計其數，而周一鑊話去年十二月有獵頭公司向佢招手，日前喺記招上強調，唔知自己係第幾輪申請。但據聞獵頭公司向佢招手前，即係去年十一月，亦曾向其他較有經驗嘅政制及內地事務局前副局長黃靜文招手，佢任內主責人權事宜，包括反歧視條例，期間同平機會有唔少接觸，但佢經過深思熟慮後最終婉拒邀請，原因係自己太熟悉政府運作，喺前官員嘅角色上，再任平機會主席好似唔係太恰當。

黃靜文所講嘅「唔係太恰當」，相比起周一鑊一句「我嘅經驗同背景係無法子改變或者刪除」，二人政治智慧高下立見，而周一鑊嘅面皮厚度，真係唔使度都知。不過，既然大局已定，由四月一日開始，香港市民亦只能無奈「當」佢係平機會主席，而他日若然發生同佢前局長身份有衝突嘅風波，就真係自作孽喇！