政壇：區詠芷珍惜食物遭干涉

有「環保女神」之稱嘅Michelle區詠芷，早前離開地球之友加入官場「熱廚房」做環境局政治助理，由民間監察環保政策角色變成有份制訂政策，自不然喺生活細節上都要身體力行實踐環保。佢話好多西餐廳都會提供餐包，但就算客人冇食過，餐廳都會丟棄，所以佢會有兩招應對，一係事前講明唔要餐包，一喺就帶膠盒打包拎走，喺翌日當早餐食。

不過，原來呢個避免浪費食品嘅做法，有時都會遇到阻力。佢話有次佢去一間西餐廳，正準備將食剩嘅餐包打包時，有餐廳職員就講到明唔准拎走，仲好似搞到佢好貪心咁。

事後佢惟有表明自己係環境局官員嘅身份，本身要以身作則避免浪費食物，餐廳職員先至破例畀佢哋打包啲餐包走。

Michelle話依家基本上做嘢會做到八點左右先離開，難以好似以前咁返屋企煮飯，所以較早放工嘅老公就負責返屋企煮飯，佢就食飯後負責洗碗喎！