SUN搞作：打橫嚟講：強國領導柯打hea國hea港

勞師動眾、花費巨大，每年一劑的「全國政協大會」喺毒空氣陰霾籠罩的京城揭幕，新聞發言人呂新華幹部睇住貓紙model answer，逐字逐字的戥着讀稿，來回應記者「臨場」的提問，互相配合得宜，非常體現中國新聞自由的操作。

呂幹部的講話，以應該係無懶音的強國標準普通話發表吧！佢不停說相信香港選民會選出一個「hea國hea港」人士擔任特首，佢所言的「hea」音，在電視新聞片字幕「翻譯」為「愛」。

我唔知佢邊度鄉下的，但佢真係唸「hea」音，而且，偏向廣東話裏頭，「吃了虧」、「受了苦」之後，連呻半聲也不敢的「ai都唔敢ai」那「ai」音相同。

香港人幾十年來接受的「國語」，係鄧麗君式優雅軟綿，甜到入心的韻調。「愛」字之國音，猶如廣東話「挨個頭到情人肩膊」的「挨」音，即如英文字母那個「i」同，舉例：「我愛你」的國語發音，像粵語「禾i ni」。

唔知呂幹部的強國普通話是否讀成「鵝hea尼」？

強國不只得呂幹部hea hea聲，有位仁兄發言督促在港同志多點組織香港青少年入內地學習「愛國愛港」時，也唸「hea」音，可見，強國人只會「hea」而沒任何「i」之情囉！

我哋香港人一直咒罵香港特區廢柴政府的庸官，成日拾吓拾吓hea爆，專門做埋啲不負責任嘅無聊殘廢舉措，原來，是怪錯他們。

其實，佢哋都係「聽話聽教」接order行事啫！故此，跟住嚟的日子，會有好多平價嘅「hea國hea港」嘅內地交流團益本地純真嘅學生仔去睇升旗禮的了！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府