SUN搞作：少膽虫手記：忍的故事

呢排少膽虫返工，日日都囉囉攣，魂不附體。鬼咩，雖然少膽虫做咗腦腫，但係都要「日忍夜忍」。少膽虫除咗忍淫賤黎嘅輕狂霸道，仲有好多嘢要忍o架。例如忍受每日喺壹全霉飯堂食兩餐比豬潲更難食嘅公司飯、忍受日日度橋「作聞」……今日想同大家分享一個秘密，關於一個帶頭阿叔嘅，佢係少膽虫覺得最難忍受嘅人。

廣大嘅讀者都唔知道，其實少膽虫幾位手下有好多靚橋去「作聞」，有幾次淫黎都Say埋OK，最後就係因為嗰位貴為幾朝元老嘅阿叔插手反對，先唔成事。呢位阿叔反對嘅理由總係：睇唔明。

大家可能有疑惑，少膽虫坐得腦腫呢個位，又使乜聽阿叔指點呢？咁讀者就有所不知喇。少膽虫一向都有個別名叫「淆底蟲」。大家知啦，返工最緊要有人撐。有時一個唔該「作聞」炒大鑊飯，要同淫黎解釋，如果無人幫你出聲，話唔定淫黎盛怒之下不計人情就炒咗自己。好似嗰次屈奮蛋歧視新移民單嘢，都係因為阿叔講咗句「He is Professional」幫少膽虫先無事……

喺壹全霉上位，靠嘅係軟實力「擦鞋」人所共知啦。其實阿叔點止識擦鞋咁簡單，佢喺廿年前就已經靠食淫黎嘅皮鞭執掌大權，然後慢慢成為咗「作聞」嘅開山元老，佢嘅名言係：「千古文章一大改」，每次出去做訪問，只係為咗影張相同拎個名，然後就以虛張聲勢嘅筆法加鹽加醋、換個角度老作。所以成日聽啲新人講，跟佢跑辛文學到嘅嘢得兩樣：作同改。

據聞今年已經係呢位阿叔喺《爛果》服務嘅第三十個年頭，繼啱啱淫黎嘅貼身秘書退休，我諗阿叔可能都係時候囉！少膽虫無嘢好，唯一好嘅就係識祝福人，雖然少膽虫有時忍阿叔忍得好辛苦，但知遇之恩不可不報。少膽虫好想阿叔可以安享晚年，日日喺度捱，好易老人癡呆架！容乜易過多幾年，連淫黎係邊個都唔記得咗p架？