政壇：政商定格：吳永嘉奉旨內地揀靚女

廠商會下月尾會喺廈門舉辦首屆工展小姐選舉，參賽嘅當然係神州佳麗。廠商會展覽服務有限公司主席Jimmy吳永嘉獻出「第一次」，擔任評判揀靚女。

工展小姐向來形象密實，甚少「露肉」鬥靚，今次去到神州，Jimmy話要令人眼前一亮，首次引入泳裝環節。但一眾佳麗唔會着「三點式」亮相，保證唔會走光，據聞有泳衣廠商已度好晒款式。廠商會都會成人之美，安排勝出嘅廈門工展小姐九月來港出席「香港食品嘉年華」，仲有年尾舉行嘅維園工展會。

噱頭咁新鮮，Jimmy話稍後喺內地其他省市搞埋「工展選美」。其實佢本人就夠晒條件參加「工展猛男」，佢展示手機內一張「玉照」，攝於當年入讀港大法律系嘅迎新營，相中嘅佢「露兩點」扮賊仔。