政壇：搞搞政：陳帆見記者開口夾着脷

北角墮升降機意外導致七人重傷事故震驚全港，機電工程署事後即刻派員調查，署長陳帆當晚更迅速抵達現場，一夫當關指揮調查同善後工作，面對記者圍訪亦毫不畏縮，佢對答如流，表現真係出色過部分問責局長o架，但口齒伶俐嘅佢尋日竟然開口夾着脷。

陳帆除咗係全港升降機嘅「揸升降機人」，當年沙士肆虐期間，時任機電署總工程師嘅佢亦加入「抗炎特工隊」設計負氣壓病房，喺國際醫療界備受推崇。直至昂坪纜車舊年大年初三發生故障，禍及八百個旅客半天吊捱凍兩句鐘，佢都有份統領調查工作。

不過，行動果斷迅速嘅佢唔知係咪為咗調查意外，捱更抵夜冇覺好瞓，尋日出席公開場合回應調查進展，提到會採取行政措施同執法行動「兩條腿走路」改善升降機安全時，突然神推鬼擁講成「兩條女走路」。咦！「兩條女」？當堂引起記者無限幻想。佢亦喺千鈞一髮間意識到自己講錯嘢兼立即修正，但似乎佢需要多啲休息係不爭嘅事實喇。