政壇：葉劉飯局與前高官敍舊

做過保安局局長嘅新民黨主席葉劉淑儀早年離開特區政府後，一直有同佢啲前上司下屬保持聯繫，佢尋日喺社交網站上載最新飯局照片，見到兩名久未露面嘅前高官，包括首位華人保安司、前上司黎慶寧同前資訊科技及廣播局局長「神童」鄺其志，同場仲有曾做過保安科、現任食環署署長梁卓文，原來佢哋約埋途經香港嘅英國高級外交官員胡克定（Chris Wood）食飯兼敍舊。

葉劉話Chris喺港英政府做過助理政治顧問，當年有份參與有關香港從殖民地過渡成為特區準備工作，係一個典型中國通，而且普通話好到不得了，最新任命係去台灣，擔任英國駐台北代表。

黎慶寧喺回歸後一年急流勇退唔做保安局局長，之後一直非常低調，好忍得口，唔似其他退休高官咁月旦時事，今次喺網上所見，瘦骨精一樣嘅佢竟然發咗福。