政壇：梁繼昌冧莊最忌兩女人

喺上屆立法會會計界選舉，各方最初都看好獲前會計界議員「波波」陳茂波支持嘅林智遠可順利當選，但喺選舉關鍵時刻，波波因加入政府出任發展局局長，其後又爆出劏房風波，多少影響到林嘅形象，最終令梁繼昌以唔夠過半數票「爆冷」當選，如果建制派換過一位形象新鮮、親政府色彩較淡嘅會計師參選，佢想連任就唔係咁易。

據聞梁繼昌最驚面對嘅對手係兩個女人，第一個係屬於「唐營」嘅靚女會計師麥嘉軒，一來如果佢參選，肯定會獲得胡定旭等「唐營」會計界人士力撐；二來佢老公、中大前校長兼前行政會議成員劉遵義，喺政、商、學界都一定影響力；三來佢係「哥哥」張國榮嘅外甥女，本身又係混血兒，外表吸引又叻女，喺青年選民愈嚟愈多嘅會計界有一定吸票能力。但據知佢從政意欲不大，有人喺年多前問過佢會否取代林智遠參選，佢諗都冇諗就耍手擰頭。

另一個潛在對手，就係現任、亦係首位女性會計師公會會長趙麗娟。佢前年參選選委會時獲波波力撐，被外界視為「梁粉」，但其實佢同「唐營」會計界關係亦唔差，係比較中性嘅建制派人選，但就唔知佢係咪有意棄商從政、瞓身參選。