政壇：洪為民引《易經》幫iProA洗底

互聯網專業協會（iProA）近年風雨飄搖，佢哋嘅新任會長Witman洪為民就話，雖然之前大家對iProA有啲負面印象，但佢就覺得要「洗底」嘅話，與其做形象工程，不如做實事仲好。

唔想做形象工程

iProA繼前會長鄧淑明捲入特首選舉風波、被指為候選人唐唐偷步製作競選網站，又有前資訊科技總監葛輝質疑前朝政府喺網上學習支援計劃招標上明益佢哋，可以話係風波不斷。Witman喺上星期一嘅iProA就職典禮度就引用咗《易經》當中嘅一句︰「貞固，足以幹事」，話只要純正堅固，堅韌不拔，堅持理想同目標，就必能成事，所以會集中精力為會員同業界做實事喎！

之不過，要洗底都唔係一時三刻可以成事，我哋就問Witman點幫iProA重整旗鼓，佢就話與其進行形象工程，不如做實事。皆因之前傳媒已大肆報道佢哋嘅負面新聞，就算依家做幾多專訪去提升形象都冇人有興趣睇，所以不如專注會務工作咁話。

咁唔知佢又有乜嘢良方妙計呢？佢就話第一招係短期內集中精力服務會員，佢哋已密鑼緊鼓搞緊連串到內地參觀團，而且會同深圳、珠海、橫琴等地政府同同業聯絡，睇下點樣可以開放當地市場畀本港資訊科技公司投資，甚至為港商爭取稅務優惠。而第二招就係吸引多啲有心創業嘅年輕人入會，介紹啲中小企畀年輕人識，等佢哋有多啲發展機會咁話。