次世代生活圈：貼身祝福

雙手、背脊、肚上畫滿了深褐色的鳳凰、孔雀、花圖案，但它們不是傳統的紋身，而是在印度代表祝福的Henna（漢娜）彩繪。這種在外國流行已久的藝術，近年傳到本港，成為年輕一族的時尚玩意。他們除了把Henna畫在身上，更有八十後誓要成為專業Henna師，為別人送上一絲絲的祝福。

「鳳凰代表女性、孔雀代表愛情、花代表農作物、腰果花代表財富……」有別於一般紋身，每一個Henna圖案背後都有意思，亦是它最吸引Abe的地方。四年前，八十後Abe與朋友在網上發現Henna這門手藝，自此便愛上。「最初覺得啲圖案好靚，後嚟知道Henna係一種好獨特嘅文化。喺以前印度社會，女人出嫁時，親友都會喺佢哋雙手、雙腳畫滿Henna，代表對佢哋嘅祝福。」

以往Henna是對出嫁女子的祝福；到今天，卻是不少本地年輕人的潮流玩意。Abe拿起一支由天然Henna粉、檸檬汁、水、糖與薰衣草精油混合而成的Henna Cone，邊為記者的手畫圖案，邊說：「畫Henna嘅材料好簡單，一、兩星期後就會自然甩色，好多人會當係特別化妝或者造型，好多後生仔玩，所以愈嚟愈流行。」

亞洲首位持牌Henna師

自認識Henna這門藝術後，Abe買書自學、研究、練習，後來更每晚跑到蘭桂坊找練習對象，「本來只係坐喺酒吧，喺自己隻手度畫，點知啲人覺得好奇，走埋嚟問係咩，之後就叫我幫佢哋畫，技術就係咁慢慢練番嚟。」除畫在人體皮膚，Abe更發揮創意，將Henna畫到結他、牆壁等物件上。表演出神入化，令他去年成功考獲美國國際漢娜協會證書，成為亞洲首位持牌Henna師。

他又開設公司幫人畫Henna，更開班授徒，「身邊好多朋友都有興趣學，加上見自己都畫咗幾年，咪決定開班同大家分享畫Henna嘅樂趣。」對Abe而言，Henna不止為賺錢，而是一份對別人的祝福，「最難忘有次幫個懷住五個月大BB嘅媽媽畫Henna，佢想我喺佢個肚皮畫Henna嚟祝福BB，祝福別人係件好開心嘅事。」