SUN搞作：打橫嚟講：預算案冇料到的原因係……

晨早批死佢冇料到的《財政預算案》喺一片噓聲後，將會沉寂無人再提，這也是財政司曾俊華樂見其成的預計。庸廢低調，好過功高蓋主，影響plan B計劃。

要度一份講咗等於無講嘅鴻圖大計，並且要面不懵、臉不好，兼阿爺肯收貨的，係好有難度o架！煲呔兄弟財爺鬍鬚曾，你好嘢！你做得到，確有前特首貪曾的功架和遺傳！

正如這位月薪近三十七萬大元的中產人士曾司長話齋，要做一份適當平衡各方利益嘅《財政預算案》，唔係咁易doo架！所以，機靈嘅財爺會用政府開支四十五億去補貼市民電費，既o氹到市民，亦無得罪發電大財團，更名正言順地「接受」電力公司加價囉！小市民，咪見唔使由你個袋裏掏錢交電費，就當無事呀！嗰啲公帑，你我都有份o架！畀人攞咗去做人情，此乃叫利民紓困？

一份由中產人士制訂而無惠及中產、不明中產現況嘅《預算案》，不特只無長遠規劃，甚至都幾虧兼好笑。喺「培育人才」方面，財爺話「優良師資是提升教育質素的關鍵」，吓！乜教育質素的提升，唔係因愛國嘅「國民教育」咩？佢仲放水設立基金，供本地傑出學生出國學藝，但「須承諾在畢業後回港擔任教師」！哈！返嚟後「違約」，係咪要回水先？無錢畀，又點呢？仲有，財爺嘅思維係咪深信讀到書的「傑出學生」，一定識教書o架呢？咪玩啦！

如斯一份無亮點嘅《預算案》，源自財爺報告的《引言》所說，為要配合行政長官第一份《施政報告》，哦！收到！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府