政壇：政商定格：劉延東女兒現身青聯春茗

全國青聯前晚搞新春晚宴，內地部分省市嘅年輕才俊都遠道而來湊熱鬧，兩位全國青聯副主席陳仲尼同新世界發展執行董事Adrian鄭志剛親自迎賓，而喺場內見到國務委員劉延東女兒、全國青聯委員楊帆，見佢同在場賓客有傾有講。楊帆依家喺香港生活同工作，問起近況時，佢就似乎唔想多講。

春茗另一個熱門話題就係政府日前加辣招壓抑熾熱嘅樓市，Adrian就話其集團今年會有多個樓盤推出，對於政府嘅連番辣招，佢話要畀時間市民消化喎。問起佢爺爺鄭裕彤嘅病況，佢就話爺爺嘅病情已穩定落嚟。

身兼全國青聯常委嘅霍震霆長子霍啟剛話，政府辣招對其家族集團生意影響唔大，事關其集團嘅主要項目發展均喺內地，但佢坦言內地出招比香港仲辣。