政壇：搞搞政：鬍鬚曾暗寸林健鋒唔掂

政府推出盛事基金嘅原意，係想資助團體舉辦大型國際盛事，一來提升香港嘅國際地位同知名度，二來吸引旅客增加收益。但過去幾年盛事基金資助嘅盛事，除咗頭一年搞得似樣啲外，近兩年都好少國際級盛事。

負責批錢嘅財爺鬍鬚曾可能都睇唔過眼，尋日喺宣讀預算案講到點樣推動香港旅遊業時，就借啲意話近年盛事基金搞咗好多項目，包括「龍舟嘉年華」，但佢希望盛事基金放眼國際，效法鄰近其他地區，唔好只係一味資助本地非牟利團體舉辦盛事。咁講擺明係寸林健鋒唔掂檔。

鬍鬚曾仲專登講埋兩大例子，第一係新加坡搞一級方程式賽車，第二係台灣同內地經常舉辦嘅NBA籃球海外賽事，佢希望盛事基金可以更進取，舉辦更多盛事。

林健鋒就話盛事基金只負責審批，唔係負責主辦，如果佢主動叫某人申請搞活動，只會被人話利益輸送，佢都想香港搞賽車，但香港街道又窄又彎，唔適合搞賽車，安全問題都成疑問。至於資助嘅盛事係咪要將盈餘退還畀政府，佢話為增加彈性同延續性，呢項條文經內部討論後已喺去年廢除。