政壇：馬逢國立會困升降機一刻鐘

財爺鬍鬚曾尋日喺立法會宣讀新政府任內首份財政預算案，但體育、演藝、文化及出版界議員馬逢國就遲開會十分鐘，事關佢喺八樓辦公室準備搭升降機落一樓時，點知部升降機「chok」咗一下後停低唔郁，將佢卡咗喺六樓同七樓中間。雖然當時部升降機嘅電力供應仍然維持正常，但佢個心都有啲驚，於是就即時撳警鐘求救，可惜控制室收唔到佢求救嘅訊號，佢於是通知助手打電話去秘書處搵人救佢。

被困升降機十五分鐘後，佢終於喺秘書處職員嘅拯救下成功逃出生天，雖然此時嘅佢仍驚魂未定，但為咗唔好畀人話佢遲大到，佢即刻以九秒九嘅速度趕返議事廳繼續聽預算案。